2023: БЕЗ ПРАВО ЗА НУДЕЊЕ / ДАВАЊЕ ПОПУСТ кога наплатата се врши во готовина

После информацијата за висината на благајничкиот максимум (неговото осигурување), месечниот износ на дозволен износ за плаќање во готово и сл., Ви обрнуваме внимание на уште една НОВИНА во овој сегмент, која ги засега СИТЕ правни лица (пред се ТРГОВЦИ НА МАЛО) кои наплатуваат во готовина.

Согласно со член 77 став 5 од НОВИОТ Закон за платежни услуги и платни системи (90/22):

„Примачот нема право да нуди попуст доколку платежните трансакции се извршуваат со готовина.“

Примач е правно или физичко лице за кое се наменети паричните средства кои се предмет на платежната трансакција (чл.2.110 од ЗПУПС).

Оваа забрана за нудење (давање) попусти се однесува на платежни трансакции што се извршуваат исклучиво со готовина, непосредно од плаќачот на примачот, без вклучување на посредник.

Готовина се книжни и ковани пари (чл. 2.79 од ЗПУПС).

Доколку примачотт нуди (дава) попуст за плаќање со готовина, Законот (ЗПУПС) утврдува глоба во износ од:

500 до 1.000 евра во денарска противвредност за микро трговец,

1.000 до 2.000 евра во денарска противвредност за мал трговец,

3.000 до 6.000 евра во денарска противвредност за среден трговец и

7.000 до 10.000 евра во денарска противвредност за голем трговец

Покрај глобата на трговецот ќе му се изрече и прекршочна санкција, забрана за вршење дејност во траење од три месеци до две години.

Глоба за одговорно лице

Глоба во износ од 300 до 500 евра во денарска противвредност ќе му се изрече на одговорното лице кај трговецот. Покрај глобата, на одговорното лице кај трговецот ќе му се изрече и прекршочна санкција, забрана за вршење должност во траење до една година.